Sannadkii lixaad ee uu Maamulka Gobolka Banaadir, Guddoomiyaha Gobolka Banaadir ahna Duqa Magalada oo Daah-furay Imtixaanka Shahaadiga 8aad ee Dugsiga Dhexe ee gobolka Banaadir

 

Muqdisho – Maanta oo ay taariikhdu tahay 9/june/2025, waxaa si rasmi ah looga daah-furay magaalada Muqdisho Imtixaanka Shahaadiga ee Dugsiyada Dhexe, kaasi oo ay sanadkaan u fadhiisteen arday tiradoodu gaareyso 41,639. Munaasabadda furitaanka ayaa waxaa si rasmi ah u daah-furay Guddoomiyaha Gobolka Banaadir ahna Duqa Magaalada Muqdisho, Mudane Dr. Xasan Maxamed Xuseen (Muungaab).

Imtixaankan ayaa sanadkan gaaraya sannadkii lixaad ee uu Maamulka Gobolka Banaadir si madaxbannaan u qaadayo, taas oo muujinaysa horumar iyo hannaan nidaamsan oo si tartiib tartiib ah loo dhisayay tan iyo markii maamulkaasi uu bilaabay in uu si toos ah ula wareego hab-maamulka waxbarashada heerka dhexe ee gobolka.

Mudane Dr. Muungaab oo hadal qiimo leh ka jeediyay munaasabadda daah-furka ayaa carabka ku dhuftay sida maamulka gobolka ugu heelan yahay kobcinta waxbarashada, isagoo xusay in laga bilaabo sannadkan la kordhin doono tirada iyo tayada dugsiyada, iyadoo mudnaanta la siinayo helitaanka waxbarasho bilaash ah oo dhammaan ardayda gobolka ay si siman uga faa’iidi karaan.

“Waxbarashada waa halbowlaha horumarka ummadda. Maamulka Gobolka Banaadir waxaa ka go’an in uu dhammaan ardayda Soomaaliyeed siiyo fursad ay ku helaan waxbarasho tayo leh, si ay mustaqbal fiican ugu yeeshaan dalkooda. Waxaan sidoo kale ka shaqeyn doonaa in aan ballaadhino fursadaha waxbarasho ee lacag la’aanta ah, gaar ahaan kuwa saboolka ah iyo kuwa ka imaanaya qoysaska danyarta ah,” ayuu yiri Dr. Muungaab.

Hambalyada Waalidiinta iyo Amniga Imtixaanaadka

Guddoomiyaha ayaa sidoo kale u mahadceliyay waalidiinta Soomaaliyeed, kuwaas oo door weyn ka qaatay kobcinta waxbarashada carruurtooda, isagoo hambalyo u diray dhammaan waalidiinta iyo macallimiinta kaalin weyn ku lahaa in ardayda ay heerkan muhiimka ah soo gaaraan.

Sidoo kale, Mudane Dr. Muungaab wuxuu si gaar ah ugu mahadceliyay hay’adaha amniga ee suga ammaanka goobaha imtixaanka, isagoo muujiyay kalsooni buuxda oo ku aaddan sida ay ciidamada booliska, ilaalada deegaanka iyo saraakiisha kale ee amniga uga go’an tahay in ay xaqiijiyaan jawi xasilloon oo ardayda ay si nabad ah ugu gudan karaan imtixaannadooda.

Munaasabadda daah-furka imtixaanka ayaa waxaa sidoo kale ka qeyb galay:

• Guddoomiye ku-xigeenka Amniga iyo Siyaasadda ee Gobolka Banaadir, Mudane Maxamed Axmed Diiriye (Yabooh),
• Taliyaha Qeybta Guud ee Booliska Gobolka Banaadir,
• Saraakiisha Imtixaanaadka
• Agaasimaha Guud ee Agaasinka waxbarashada gobolka Banaadir Mohamed Yusuf
• Agaasimaha Imtixaanaadka AWGB Cabdiqaadir Xoosh
• iyo madax kale oo ka tirsan maamulka gobolka, kuwaas oo dhammaantood muujiyay sida ay uga go’an tahay daryeelka iyo horumarinta waxbarashada.

Imtixaanka Shahaadiga ah

Inkastoo imtixaannada shahaadiga ah ay yihiin tallaabo muhiim ah oo lagu qiimeeyo heerka aqooneed ee ardayda, haddana waxaa la ogyahay in ay jiraan caqabado badan oo haysta hanaanka waxbarasho ee dalka – sida dugsiyada aan lahayn agab ku filan, iyo carruur badan oo aan heli karin fursado waxbarasho oo habboon, sida ay cilmi baaristooda ku sheegeen machadka Heritage : https://heritageinstitute.org/the-education-we-need-addressing-challenges-in-curriculum-teaching-assessment-administration/, 

Si kastaba ha ahaatee, maamulka gobolka Banaadir ayaa muujiyay dadaal muuqda oo ku wajahan sidii loo horumarin lahaa kaabeyaasha waxbarasho ee magaalada Muqdisho iyo deegaannada ku xeeran, iyadoo la hirgelinayo mashaariic cusub oo lagu dhisayo dugsiyo cusub, lagu kordhinayo fasallada, iyo tababbar joogto ah oo la siinayo macallimiinta.

Mustaqbalka Waxbarashada Gobolka Banaadir

Maamulka Gobolka Banaadir ayaa sanadihii la soo dhaafay muujiyay in uu si dhab ah u garowsaday doorka waxbarashadu ku leedahay horumarka bulshada. iyadoona dugsiyada dadweynaha ay ahaayen 25 dugsi, haatan maamulka gobolka uu gaarsiiyay 50 dugsi oo bilaash ah, 

 Waxaa socda qorshayaal ballaaran oo isugu jira:

• Iskaashi  hay’adaha caalamiga ah ee waxbarashada,
• La socod joogto ah oo lagu sameynayo tayada waxbarashada,
• Kobcinta agabka iyo manhajka waxbarashada,
• iyo hirgelinta nidaamyo casri ah oo lagu kobcinayo kartida ardayda.

Waxaa sidoo kale la filayaa in maamulka gobolka uu hormuud u noqdo dadaallo heer qaran ah oo lagu horumarinayo manhajka waxbarashada si loo helo nidaam midaysan oo ardayda Soomaaliyeed ay si siman uga faa’iidaystaan.

Gunaanad

Ugu dambeyn, daah-furka Imtixaanka Shahaadiga ee Dugsiyada Dhexe ee sanadkan wuxuu yahay mid astaan u ah dadaalka iyo horumarka laga gaaray dhanka waxbarashada ee gobolka Banaadir. Maamulka gobolka oo uu hoggaaminayo Dr. Muungaab ayaa muujiyay in ay ka go’an tahay in la sii ambaqaado jidka horumarka, lagana shaqeeyo sidii waxbarasho tayo leh oo loo siman yahay ay u noqon lahayd xaqiiqo muuqata, halkii ay ahaan lahayd himilo fog.

Waa tallaabo lagu farxo in kumannaan arday ah ay maanta u fadhiisteen imtixaan muhiim u ah noloshooda waxbarasho. Taasi waa rajo iyo iftiin u bilowday jiilka cusub ee Soomaaliyeed — jiil leh himilooyin, hami, iyo hibbo u baahan kaliya fursad si ay u iftiimiyaan.